តើអាស៊ានមានប្រយោជន៍អ្វីខ្លះ?

នៅឆ្នាំ ២០១៥ កញ្ចុំប្រទេស​១០ប្រទេសនឹងក្លាយជាភូមិតែមួយ ។ នៅពេល នោះយើងបានអ្វីខ្លះ ? មានមតិខ្លះយល់ថាប្រទេសតូច ៗ ដូចយ៉ាង​កម្ពុជា មិនបានផលអ្វីទេពីអាស៊ាន មានតែទទួលរងគ្រោះទៅវិញ​ ព្រោះ​សេដ្ឋកិច្ច​យើងនៅទន់ខ្សោយ យើងមានអីទៅលក់ឲ្យគេ មានអីទៅ​ជែង​គេ ។ នេះ​ជាហេតុផលមួយដែលធ្វើឲ្យអ្នកខ្លះ​ដេក​អស់សង្ឃឹម នាំគ្នា​ដាំ​ចេក រង់ចាំថាពេលណាពេលហ្នុងទៅដោយមិនធ្វើអី ។ ពេលនេះយើងគួរនាំ​គ្នាពិចារណា​ទាំង​អស់គ្នាឡើងវិញ ។ គឺពិចារណាបែបចិញ្ចឹមក្រពះ កុំបាច់ដល់​រឿងសំពីងសំពោងកម្រិតស្រុកទេស ។ ប្រទេសមួយ ៗ កំពុងរៀបចំ​ខ្លួន​ដើម្បីទីផ្សារអាស៊ាន ២០១៥ ដែលនៅខ្វះ ៣ ឆ្នាំទៀតប៉ុណ្ណោះនឹងមកដល់ ។ គម្រោងធំ ៗ ជាកិច្ចការរបស់ថ្នាក់ដឹកនាំប្រទេស តែអ្វីដែលយើងធ្វើបាន យើងគួរចេញដំណើរដោយខ្លួន​ឯង ។ សម្រាប់អ្នកដែលមិនទាន់បានត្រៀមខ្លួន​សោះនោះ គួរត្រៀមខ្លួន​យ៉ាងណា ? ការស្វែងយល់អំពីអាស៊ាន អំពីកោសិកា​អាស៊ានជារឿងដំបូង​បង្អស់ ។ ចំណុចមួយដែលខ្ញុំគិតថាយើងអាចធ្វើដោយ​ខ្លួនឯង គឺការស្វែងយល់អំពីភាសាញាតិជិតខាងយើង ។ មិនបាច់សំឡឹង​ឆ្ងាយពេកទេ មើលត្រឹមឡាវ វៀតណាម ថៃ ភូមា...ក៏សឹងថាមានប្រយោជន៍​ទៅហើយ ។ តើធនធានមនុស្សរបស់យើងដើម្បីបំពេញតម្រូវការ​ក្នុងភូមិ​អាស៊ាន​មានគ្រប់គ្រាន់ហើយឬ​នៅ ?​​ តំបន់សេដ្ឋកិច្ចរួមមួយនេះត្រូវការ​ធនធានមនុស្សយ៉ាងក្រាស់ក្រែល ។​ តើធ្វើម៉េចនឹងអាចចូលដល់​ជម្រៅនៃ​បញ្ហា ? ជាការងាយទេ ប្រសិនបើប្អូន ៗខ្វាបានសញ្ញាបត្របាក់ឌុប​ហើយ​ ការងារបន្ទាប់គឺការរៀនបំប៉នភាសាបរទេស ពិសេសអាចបាញ់ឆ្ពោះ​ភាសា​ណាមួយក្នុងចំណោមភាសាខាងលើ ។ ខ្ញុំប្រើ​ពាក្យថា បំប៉ន បានន័យថា យើងមានវារួច(ខ្លះ)ស្រេច​ហើយ ប៉ុន្តែដោយជាប់ដៃរៀនប្រឡងបាក់ឌុប ទើបដាក់ដៃខាងភាសាសិន ។ សម្រាប់​ប្រទេសថៃ គេមានអាហារូបករណ៍​ផ្តល់ដោយរដ្ឋាភិបាលថៃដល់និស្សិតបរទេស​រៀង​រាល់ឆ្នាំ ។​ ពេលនេះជាប់​បាក់ឌុបហើយមែនទេ ? នេះជា​រដូវស្វែងរក​អាហារូបករណ៍ ។ ប្អូន ៗ ត្រូវនាំគ្នា​ទៅទាក់ទងខាងផ្នែក​អាហារូបករណ៍​យ៉ាងដិតដល់នៅតាមស្ថាប័ន​ពាក់​ព័ន្ធ ​ពិសេសតាមស្ថាប័នសិក្សាអប់រំ ។ ត្រូវទៅទាក់ទងឲ្យដិតដល់ ព្រោះ​នៅស្រុកយើង គេច្រើនផ្អឹបព័ត៌មានទុកដល់ជិតក្លូស៍បានយកមកប្រកាស ។ នេះជាទម្លាប់ទៅហើយ ។

ទីផ្សាររួមអាស៊ានជិតមកដល់ហើយ ។

 

កុំចាំពេលមកដល់បង្កើយទើបរត់ប្រសាចជែងជើងគ្នា ។ ពេលនេះមានផ្លូវទំនេរច្រើនណាស់ដែលកំពុងចាំអ្នកទាំងអស់គ្នា ។